तीन वर्षको कोर्स तेतीस दिनमा पूरा गर्दै रचिन् सानियाले इतिहास

रौतहट, मंसिर २५

रौतहटकी १६ वर्षीया सानिया खातूनले मुस्लिम समुदायको पवित्र ग्रन्थ कुरान शरीफ अध्ययनमा सामान्यतया सम्भव नमानिने उपलब्धि हासिल गरेकी छन् । तीन वर्षभन्दा बढी समय लाग्ने कुरान अध्ययन कोर्ष सानियाले तेतीस दिनमै पूरा गर्दै नेपालमा कीर्तिमान कायम गरेकी हुन् । 

मुस्लिम समुदायको पवित्र धार्मिक ग्रन्थ कुरान शरीफ अध्ययन गर्न सामान्यतः तीन वर्षभन्दा बढी समय लाग्ने बताइन्छ । तर रौतहटको गढ़ीमाई नगरपालिका–३, गमहरियाकी १६ वर्षीया सानिया खातूनले यस कठिन कोर्षलाई जम्मा ३३ दिनमै पूरा गर्दै ऐतिहासिक कृतिमान स्थापित गरेकी हुन् । नेपालमा छोटो समयमा कुरान अध्ययन पूरा गर्ने व्यक्तिको रुपमा उनको नाम दर्ता भएको छ । 

सानिया रौतहटको गढ़ीमाई नगरपालिका–३ की स्वर्गीय हाजी शेख ताहिर हुसैनकी नतिनी र शेख अबुलैसकी छोरी हुन् । आमा स्वर्गीय ओसीमा खातूनकी चौथो सन्तान सानियाले आफ्नै दृढ इच्छाशक्ति, कठोर मेहनत, निरन्तर अभ्यास र आत्म–विश्वासका कारण वर्षौं लाग्ने कोर्ष एक महिनामै पूरा गरेको बताउँछिन् । सानियाले गढ़ीमाई नगरपालिका–३ मा रहेको मदरसा इश्लाहुल मुस्लेमीनमा अध्ययन गर्दै सफलता हासिल गरेकी हुन् ।

मदरसा इश्लाहुल मुस्लेमीनमा देशका विभिन्न जिल्लाबाट आएका एक हजारभन्दा बढी विद्यार्थी अध्ययन गर्छन् । सुविधा सम्पन्न छात्रावास, शान्त वातावरण र अनुशासित शैक्षिक प्रणालीका कारण यहाँ गुणस्तरीय धार्मिक शिक्षा पाउने विद्यार्थीको संख्या वर्षेनि बढ्दै गइरहेको छ । यही वातावरणले सानियालाई अझ केन्द्रित भएर अध्ययन गर्न प्रेरणा दिएको शिक्षकहरू बताउँछन् ।

कुरान मुस्लिमहरूको एकमात्र पवित्र ग्रन्थ हो, जसलाई अल्लाहको वाणी तथा मानवजातिका लागि मार्गदर्शन मानिन्छ । पैगम्बर मोहम्मदमार्फत २३ वर्षको अवधिमा अवतरित यो ग्रन्थलाई अध्ययन गर्न सामान्यतया वर्षौं लाग्ने गर्दछ । तर १६ वर्षकी सानियाले ३० पारा, १ सय १४ सूरत, करिब ६ हजार ६ सय ६६ आयत समेटिएको सम्पूर्ण कुरान ३३ दिनमै पूरा गरेर उपलब्धि हासिल गरेकी हुन् । 

सानियाले रौतहटको सरस्वती माध्यमिक विद्यालय मलाहीटोलमा कक्षा १ देखि १२ सम्म अध्ययन गरिसकेकी छन् । आगामी दिनमा एमबीबीएस अध्ययन गरी चिकित्सक बन्ने उनको इच्छा रहेको छ । 

धार्मिक ज्ञानसँगै आधुनिक शिक्षा हासिल गर्ने उनको जिजीविषाले समुदायमा प्रेरणादायी संदेश दिएको छ । सानियाको उपलब्धिले नेपालकै मुस्लिम समुदायमा उत्साह र प्रेरणाको नयाँ ऊर्जा थपिदिएको छ । (पत्रकार ओमप्रकाश यादवको सहयोगमा)